Шефот на Арапската лига стравува од избувнување граѓанска војна во Сирија

Генералниот секретар на Арапската лига Набил ел Араби изрази стравување дека е можно да избувне граѓанска војна во Сирија, која ќе има последици за нејзините соседи.

- Да, се плашам од граѓанска војна. Настаните, за кои сега дознаваме, може да доведат до граѓанска војна, рече Ел Араби.

Во моментот во Сирија има набљудувачка мисија од Арапската лига, која следи дали таа го почитува договорот за прекин на репресиите на антивладините демонстранти.

- Секакви проблеми во Сирија ќе имаат последици за соседните земји, рече Ел Араби за египетската телевизија „Ал Хајат“.

Тој ги оцени како вознемирувачки извештаите на шефот на мисијата, но додаде оти нема сомнение дека убиствата во Сирија се намалиле по пристигнувањето на набљудувачите.