Во Бон меѓународна конференција за иднината на Авганистан

Во Бон денеска ќе се одржи меѓународна конференција за иднината на Авганистан.

Претставници на 85 држави и 16 меѓународни организации ќе дискутираат во германскиот град за развојот на ситуацијата во Авганистан по повлекувањето на странските сили во 2014 година, кои во моментов се борат против талибанците и Ал Каеда.

Меѓу учесниците на конференцијата се министрите за надворешни работи на околу 60 земји, меѓу кои се Иран и Турција, генералниот секретар на Обединетите нации Бан Ки-мун, авганистанскиот претседател Хамид Карзаи и американскиот државен секретар Хилари Клинтон.

Учесниците се очекува да разговараат за идното предавање на контролата на безбедноста во рацета на локалната армија и полицијата, меѓународната помош на долгорочен план, како и евентуалната спогодба со талибанците за прекин на конфликтот.

Пакистан одлучи да ја бојкотира конференцијата, во знак на протест поради убиството на негова територија на 24 пакистански војници во воздушна операција на силите на НАТО.